Posted by: lrrp | November 2, 2014

අනුරාධපුර යුගයේ විදෙස්‌ සබඳතා ගැන බඳගිරියෙන් සාක්‍ෂි මතුවෙයි!

බඳගිරිය ප්‍රදේශයේ මාර්ග සංවර්ධන කටයුතු සිදුකරමින් සිටියදී පෞද්ගලික සමාගමකට ඉපැරැණි තඹ කාසි 241 ක්‌ හමුවී තිබේ. ඉන් පසු පුරාවිද්‍යා දෙපාර්තමේන්තුවේ නිලධාරීන් කළ කැණීම්වලින් එහි තිබී තවත් ඉපැරැණි තඹ කාසි 2000 කට අධික ප්‍රමාණයක්‌ සොයාගෙන තිබේ.

mony2පල්ලේමලල බඳගිරිය මාර්ගයේ ප්‍රතිසංස්‌කරණ කටයුතු සිදුකිරීම පෞද්ගලික සමාගමක්‌ මගින් දැනට සති කිහිපයකට පමණ පෙර ආරම්භ කර තිබුණි. එහිදී බඳගිරි ප්‍රදේශයේදී එම සමාගමේ බැකෝ යන්ත්‍රයක ගැටී ඉපැරැණි කාසි මුට්‌ටියක්‌ බිඳී ඇති අතර එහි තිබී පැරැණි තඹ කාසි 241 ක්‌ හමුවී තිබේ. එදිනම ඔවුන් එම කාසි පුරාවිද්‍යා දෙපාර්තමේන්තුවේ නිලධාරීන්ට භාරදී තිබුණි.

මෙම සිද්ධිය සැලවීමත් සමඟ එම ස්‌ථානයට පැමිණි කලාප භාර නිලධාරි පුරාවිද්‍යා පර්යේෂණ සහකාර සුමේධ පන්ඩිතරත්න සහ සංවර්ධන නිලධාරි අජිත් ඉන්දික යන නිලධාරීන් එම ස්‌ථානයේ සංවර්ධන කටයුතු තාවකාලිකව නතර කරන ලෙසට එම සමාගමෙන් ඉල්ලා තිබේ. ඉන් අනතුරුව එම කාසි මුට්‌ටිය තිබුණේ යෑයි සැලකුණු ස්‌ථානය පරීක්‍ෂා කළ එම පුරාවිද්‍යා නිලධාරීන්ට තවත් තඹ කාසි 40 ක්‌ හමුවී ඇත. පසුදින කාසි හමුවූ ප්‍රදේශය අවට පරීක්‍ෂා කිරීමේදී එම නිලධාරීන්ට තවත් ඉපැරැණි තඹ කාසි 1500 කට අධික ප්‍රමාණයක්‌ සොයා ගැනීමට හැකි වූහ.
mony1
මාර්ගය පුළුල් කිරීමේ කටයුතුවලදී බැකෝ යන්ත්‍ර මගින් ඉවත් කරන ලද පස්‌ ගොඩවල් සූක්‍ෂම ලෙස පරීක්‍ෂා කිරීමේදී එක්‌ නිවසක්‌ ඉදිරිපිට තිබූ පස්‌ ගොඩක තිබී නැවත වරක්‌ කාසි හමුවී තිබේ. එදින හමුවූ කාසි වලින් 503 ක්‌ වෙනම සොයාගෙන ඇති අතර ඉතිරිය මුට්‌ටියේ තිබුණ ආකාරයෙන්ම පොදියක්‌ ලෙස සොයාගෙන තිබේ.

කාසිවලට අමතරව එම ස්‌ථානයේ තිබී ඉපැරැණි මැටි බඳුන් කැබලි කිහිපයක්‌ සහ මැටි බඳුන් නිර්මාණයට යොදාගත් අත්ගල් දෙකක්‌ද මෙම ස්‌ථානයේ තිබී සොයා ගැනීමට එම පුරාවිද්‍යා නිලධාරීන්ට හැකිවී තිබේ. එම මැටි බඳුන්වල නිර්මාණ ලක්‍ෂණ අනුව ඒවා අනුරාධපුර යුගයට අයත් බවට දැනට අනුමාන කර තිබේ.

බඳගිරියෙන් හමුවූ ඉපැරැණි තඹ කාසිවල පුද්ගල මුහුණු, සූර්ය සංකේත හා තවත් හඳුනාගත නොහැකි සංකේත රාශියක්‌ දක්‌නට ලැබේ. මෙරට කාසි නිර්මාණ තාක්‍ෂණය පරීක්‍ෂා කිරීමේදී මුල් කාලීනව මානව රූප සහිත කාසි (ශ්‍රී ලක්‍ෂ්මී කාසි) භාවිතයේ පැවතියද පුද්ගල මුහුණු පමණක්‌ යොදා කාසි භාවිතයේ පැවති බවට පුරාවිද්‍යාත්මක සාධක ලැබී නොමැත. එම නිසා මෙම කාසි ස්‌ථිර වශයෙන්ම විදේශීය රටකට අයත් විය හැකි කාසි ලෙස හඳුනාගත හැකි වේ. ඒ අනුව මෙම කාසි අනුරාධපුර යුගයේදී රෝමයෙන් හෝ වෙනත් විදේශ රටකින් ශ්‍රී ලංකාවට ගෙනෙන්නට ඇතැයි පුරාවිද්‍යා නිලධාරීහු අනුමාන කරති.

පසුගිය ජුලි මාසයේදී ඓතිහාසික සිතුල්පව්ව රාජමහා විහාර භූමියේ පුරාවිද්‍යා දෙපාර්තමේන්තුව මගින් කරන ලද කැණීමකදී හමුවී තිබුණේ මීට බෙහෙවින් සමාන කාසිය. එම ස්‌ථානයට පැමිණි මහාචාර්ය ඔස්‌මන්ඩ් බෝපේආරච්චි මහතා පෙන්වා දී ඇත්තේ ඒවා රෝම කාසි විය හැකි බවයි. එම නිසා බඳගිරියෙන් හමුවූ තඹ කාසිත් එකහා සමාන බැවින් රෝම කාසි ලෙස තීරණය කිරීමට එයද එක්‌ සාධකයක්‌ ලෙස ගත හැකිය.

බඳගිරිය ප්‍රදේශයේ තිබෙන ඉපැරැණි වැවත් රජමහා විහාරයත් අනාදිමත් කාලයක සිට එම ප්‍රදේශයේ හොඳ ජනාවාසයක්‌ තිබුණ බවට සාක්‍ෂි දරයි. පුරාවිද්‍යා නිලධාරීහු පවසන ආකාරයට බඳගිරිය ප්‍රදේශයේ එකල මැටි කර්මාන්තය ආශ්‍රිත විදේශීය වෙළෙඳපොළක්‌ද තිබී ඇත. එයට හොඳම උදාහරණය වනුයේ ඉහත හමුවූ රෝම කාසි හා මැටි බඳුන් කැබලිය. මේ පිළිබඳව වැඩිදුරටත් පරීක්‍ෂණ සිදුකරන බව පුරාවිද්‍යා දෙපාර්තමේන්තුව පැවසූහ.

Advertisements

Responses

  1. “පුද්ගල මුහුණු පමණක්‌ යොදා කාසි භාවිතයේ පැවති බවට පුරාවිද්‍යාත්මක සාධක ලැබී නොමැත. එම නිසා මෙම කාසි ස්‌ථිර වශයෙන්ම විදේශීය රටකට අයත් විය හැකි කාසි ලෙස හඳුනාගත හැකි වේ.”
    — ඕකනේ ඉතින් කරන්න බැරි අපේ පුරා විජ්ජා කාරයෝ එක්ක…


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Categories

%d bloggers like this: